Развіваем супрацоўніцтва паміж актывіст_камі і журналіст_камі
3-га ліпеня запрашаем на цёплую вечаровую сустрэчу, дзе журналіст_кі і актывіст_кі сустракаюцца ў нефармальнай атмасферы, каб лепш зразумець адно аднаго, падзяліцца досведам супрацоўніцтва і, магчыма, пачаць нешта новае разам.
Гэта будзе прастора, дзе можна адкрыта пагаварыць пра тое, чаго часта так не стае: узаемаразумення, кантактаў, падтрымкі. Без працяглых лекцый і прамоваў. Толькі людзі, іх досвед і імкненне знайсці агульнае.
Падчас сустрэчы мы пачуем некалькі кароткіх гісторый пра тое, як журналіст_кі і актывіст_кі ўжо паспяхова супрацоўнічалі. Сваім досведам сярод іншых падзеляцца анлайн-медыя «Салідарнасць», рэдактарка спецпраектаў Hrodna.life, дабрачынны фонд «Краіна для жыцця» і каманда ЛГБТК+ініцыятывы.
Мы бяром на сябе стварэнне бяспечнага і камфортнага асяроддзя, а таксама напоі і закускі, з вас – добры настрой і адкрытасць да камунікацыі з іншымі. Для спрашчэння камунікацыі частка нашай сустрэчы будзе мадэравацца.
Мерапрыемства ладзіць арганізацыя ІншыЯ і аб’яданне беларусаў Нямеччыны Разам у партнёрстве з Беларускай асацыяцыяй журналістаў.
Дзяліцеся анонсам з тымі, каму гэта можа быць важна і карысна!
Мерапрыемства адбываецца ў межах праекта «Together 4 values — JA», які сумесна рэалізуюць арганізацыі ІншыЯ і Razam e.V. пры падтрымцы Міністэрства замежных спраў Федэратыўнай Рэспублікі Германія.
